Працяг раскопак фундамента капліцы

У жніўні 2021 г. працягнуты археалагічныя раскопкі фундамента Крыжаўздвіжанскай капліцы, якая калісьці дзейнічала на старых могілках у Лаўрышаве. Гэты невялікі храм адносіўся да Лаўрышаўскага манастыра. Ён быў пабудаваны з драўляных брусоў на валунным фундаменце.

Раскопкі вядуцца для таго, каб вывучыць канструкцыю фундамента і вызначыць час пабудовы капліцы. Першы этап раскопак праводзіўся ў 2019 годзе. Тады быў раскапаны фундамент прытвору і паўднёвая частка фундамента асноўнага памяшкання. Сёлета раскапана і абследавана яго паўночна-ўсходняя частка.

На раскопках працавала археалагічная валанцёрская група з 7 чалавек, і яшчэ двое выконвалі дапаможныя даручэнні. Амаль усе яны не раз удзельнічалі ў раскопках у Лаўрышаве. Сярод моладзі асабліва добра праявілі сябе старэйшыя ўдзельнікі: з хлопцаў – навучэнец Іван Малец (які закончыў 3 курс аддзялення тэхнічнага забяспячэння працэсаў сельскагаспадарчай вытворчасці Жыровіцкага дзяржаўнага аграрна-тэхнічнага каледжа), а з дзяўчын – студэнтка Дар’я Быстрыцкая (закончыла 1 курс факультэта міжкультурных камунікацый Мінскага дзяржаўнага лінгвістычнага ўніверсітэта).

Раскопкі вядуцца Інстытутам гісторыі НАН Беларусі пры ўдзеле Лаўрышаўскага манастыра. На цяперашні час вызначана, што капліца была пабудавана не пазней XVII стагоддзя. Фундамент захаваўся поўнасцю, што дазваляе вывучаць па ім прыёмы будаўніцтва малых храмаў у мінулым.

Т. Маслюкоў